FOCUS 2.0-in chhungkaw 75,000 huam dawn

FOCUS 2.0 hmalakna tura thuneitu sang Society for Climate Resilence Agriculture in Mizoram (SCRAM) chu nimin khan Planning & Programme Implementation conference hall-ah chairman Lalduhoma, chief minister hoin an ṭhukhawm a; FOCUS 2.0 hi khaw 700-a chhungkaw 75,000 huama kalpui tur a nih thu tarlan a ni.

Ṭhutkhawmah hian FOCUS 2.0 project mil turin kalphung ṭhenkhat thlak remtih a nih bakah, nihna hming (nomenclature) ṭhenkhat thlak remtih a ni a; FOCUS 1.0 aṭanga bungrua leh hmanruate chhawm dan tur te, state level, district level leh village level-a thuneitu turte an rêl bawk.

FOCUS 1.0 hun a zo tawh a, FOCUS 2.0 chu Mizoram sorkarin Bána Kaih (Handholding) nena kal dun turin a ruahman. International Fund for Agricultural Development (IFAD) sum vbc 380 hman phalna Finance department pek a ni tawh a, sorkar laipuiah dilna thehluh mek a ni. Department hrang hrangte'n hma an lakhona (convergence) a nih angin Planning department hnuaiah kum ruk chhung kalpui a ni dawn.

FOCUS 2.0 hi Mizoram district 11-a khaw 700 tuamin chhungkaw 75,000 huama kalpui a ni dawn a; ram nei lo chhungkua pawh 7,000 huamtir tum a ni.

FOCUS 2.0 thuneitu sang ber governing council thar dinna notification chu August 20, 2025 khan tihchhuah niin, 'Society for Climate Resilient Agriculture in Mizoram' (SCRAM) tih a ni a; Chief Minister chu ex-officio chairman niin, Planning secretary chu ex-officio member secretary a ni.

Ṭhutkhawmah hian Land Resources, Soil & Water Conser-vation minister Lalthansanga, Agriculture minister PC Vanlal-ruata, adviser to CM pahnih TBC Lalvenchhunga leh Dr KC Lalmalsawmzauva, chief secretary Khilli Ram Meena leh member dangte an tel.