Scho' leh FCAA 2023 chungchang college SU-te'n CM an zawtfiah

Aizawl City College Joint Students’ Union (ACCJSU) hruaitute chuan nimin khan chief minister Lalduhoma a piasaah an hmu a; zirlaite scholarship la sem theih loh chhan leh Forest (Conservation) Amendment Act, 2023 dodalna awm chungchang an zawtfiah.

CM Lalduhoma chuan, scholarship chu sem a nih thuai theih nan hma an lak mek thu a lo hrilh a; SNA SPARSH vanga budget sanction theih loh pawh sorkar laipuiin one time exemption a pek phal tawh thu leh, sorkar laipui ngen angin DO letter a thawn nghal tur thu a sawi.

ACCJSU tarlan danin, Forest (Conservation) Amendment Act, 2023 chungchangah Lalduhoma chuan, Article 371G rahbehna anga sawi a awm chu thu dik lo a nih thu a sawi a; sorkarin an ngaihtuah ber chu mihring hmasawnna a nih thu a lo hrilh.

Chief Minister chuan, Article 371G chu a duangtu zingah a tel avangin a hriat chian thu a sawi a, "Ramngaw leh ramsate nei ṭeuh mah ila, ram mipuite himna a derthâwn a, kan dinhmun a ṭhat si loh chuan awmzia a awm lo," a ti a; ram leh hnam hmasawnna atan FCAA an pawm chu a ṭhat zawk thu leh, ZPM chu Mizo mipui hmangaih tak taktu an nih avangin Mizoram tana ṭha lo chu engmah an tih ring lo tura Mizoram mipui a duh thu a sawi.

ACCJSU chuan, CM-in ṭha taka a lo dawnsawnnaah an lawm thu an sawi a; zirlaite'n a rang thei ang bera scholarship an dawn theih nan theihtawp chhuah tur leh vilpui reng turin an ngen a ni.