Sairanga kudam leh rêl chawlhhmun Supply minister Chhanzova'n a enfiah
Food, Civil Supplies & Consumer Affairs (FCSCA) minister B Lalchhanzova chuan nimin khan Sairang rêl chawlhhmun leh Sairanga Food Corporation of India (FCI) leh FCSCA department-in kudam an sak mek a enfiah.
Supply Minister chuan, Sairang rel chawlhhmun chu FCSCA department-in an nghakhlel tawh hle tih sawiin, "Buhfai mai bakah, mipui ni tin mamawhte a rawn phur thleng thei tawh dawn. FCI leh kan department lamin Sairangah kudam kan nei dawn a, Kawnpui-Sairang inkar kawng chhia vanga kan buaina ṭhinte pawh a ziaawm phah ngei ang," a ti.
September 13, 2025-ah Prime Minister-in Sairang rel station a hawn dawn thu sawiin B Lalchhanzova chuan, "Min namnûlin, fel lo nuaiin an hawntir ang tih kan hlau a, chuvangin, he lai hmun hi tlawh kan ni. Hawn tawh hnua a fel lo hriat ai chuan hawn hma ngeia tlawh hi ṭha kan ti a ni," a ti a; hna ṭha taka thawk turin thawktute a chah.
NF Railways hotue FCSCA Minister lo dawng sawngtute chuan zawhna chhangin, ṭicket man leh rel tlan rei hun chhung tur tlangzarh a la nih loh thu an sawi.
FCI hotute chuan, Sairanga an kudam aṭangin Aizawl, Lunglei leh Lawngtlai district-te buhfai an pek dawn thu an sawi a, "District dang zawng chu Bairabi aṭang thoin pek a ni ang," an ti.
FCSCA Minister chuan FCI kudam tur sak mek a tlawhnaah, rêl a lo luh ṭêp tawh avangin hna thawh chak a pawimawh thu a sawi a, kumin chhunga hman theih ngei tura peih tum turin a hrilh.
FCI hian Sairangah hian kudam pathum an sa a, buhfai quintal 50,000 leh quintal 25,000 len theihna tur an peih tawh a, quintal 25,000 dang len theihna tur an sa mek. Central PWD leh contractor-te chuan December 2025-ah chuan weighbridge-te nen hman theih tura peih hman ngei an tum thu an sawi.
FCSCA department pawhin Sairangah buhfai quintal 35,000 len theihna tur kudam an sa mek a, quintal 1,000 len theihna tur pahnih sak zawk tawh niin, quintal 15,000 len theihna tur sak mek a ni. B Lalchhanzova chuan, rêl a lo luh hnaih tawh avangin rang taka peih tum turin hnathawktute a hrilh bawk.