KHAWTHLIR

Draft roll tlangzarh

Mamit district election officer K Laltlawmlova chuan nimin khan Dampa bial MLA by-election neih tura draft electoral roll a tlangzarh. Dampa bialah hian polling station 41 a awm a, voter 20,405 an awm. Electoral roll ennawnnaah hian hming thun luh, paih leh siamṭhat ngaite tan September 17, 2025 thleng dilna hun hawn a ni a, final electoral roll chu September 30, 2025-ah tlangzarh tum a ni.

Sikul endik

Mizoram State Commissioner for Persons with Disabilities office leh Audit team chuan nimin khan Aizawla PM Shri zinga mi MICE School, Mizo High School leh Mizo Higher Secondary School-ah access audit an buatsaih. Sikul pathumah hian rualbanlo wheelchair hmang te, mitdel leh rualbanlo dangte tan tel ve leh veivah awlsamna siam a nih leh nih loh an endik a ni.

Sava veh khap

Serchhip district magistrate Paul L Khuma chuan thupek tichhuakin, Serchhip district-ah air gun/air rifle, silai, sairawkherh leh hmanraw dang hmanga ramsa leh sava veh leh kah a khap. Thupek zâwm lote chu BNS, 2023 Section 223 hmanga hrem theih an nih thu a tarlang bawk.

EVM center

Dampa Assembly Constituency-a MLA by-election neih turah mipui tana electronic voting machine (EVM) hmanga vote thlak dan zirna hmun, EVM Demonstration Center chu West Phaileng BDO office leh Reiek BDO office-ah vawiin aṭangin siam a ni dawn. A duh apiang tan EVM hmanga vote thlak dan leh VVPAT-a vote tlak dan belhchian theih a ni ang.

Magistrate-in khap

Aizawl district magistrate Lalhriatpuia chuan September 1, 2025 khan thupek tichhuakin, Aizawl district-ah danin a phal bak kuhva leh bungrua rêng rêng lak luh leh phurh khap a nih thu a puang. Aizawl DC chuan, sorkar hriatpuina tel loa lirtheia kuhva phurh/tawlh chu dan kalh a nih thu a tarlang a; thupek bawhchhiate chu dan hmanga hrem theih an nih thu a tarlang bawk. Thupek hi thla hnih chhung atan a ni.

HIV Test Drive

Lunglei District AIDS Prevention & Control Committee chuan nimin khan an chairman Navneet Mann, district bawrhsap hoin Lunglei district-a HIV chungchang inzirtirna leh thisen endik rûnpui, Intensified IEC Campaign cum HIV Test Drive Campaign kalpui dan tur an rêl. Campaign hi September 11, 2025-ah Lunglei Convention Centre-ah hawn ni se, Lunglei district-a thingtlang khaw thlan bikah kalpui ni se, an ti.