Prime Minister rawn zin tur pualin AMC-in kawngpui kam an thian fai

September 13, 2025 (Inrinni)-a Aizawla prime minister Narendra Modi rawn zin tura inbuatsaihna atan Aizawl Municipal Corporation (AMC)-a thawkte chu nimin khan Chaltlang leh Chanmari inkar kawngpui leh a chhehvel tifaiin an hnatlang.

AMC hnatlang hi Aizawl mayor Lalrinenga Sailo leh municipal commissioner Joseph H Lalramsanga te'n an ho a, mi ṭhahnem tak an thawk chhuak. Kawng sir hnimte an sâm bakah, vawnbán leh tlâkdâl bâlte an silfai a ni. A hmaa an lo tihfai tawh Dawrpui leh Zarkawt venga lungbangte rawng an hnawih bawk.

AMC hi PM Modi-a'n lirtheia a paltlang tur Ṭhuampui Helipad leh Lammual inkar kawngpui leh Lammual tifai leh chei tura tih an nih angin, Prime Minister rawn zin turah faina lamah theihtawpin an inbuatsaih a, August 26 khan Lammuala bawlhhlawhte an thian fai. AMC ngen angin PM paltlang tur veng local council 14 chuan August 26 khan hnatlang koin, an veng chhunga kawngpui leh a chhehvel leh tui luankawrte an lo tifai bawk a ni.

AMC chuan August 27, 2025 khan thu chhuahin, Prime Minister a rawn zin dawn avang hian Ṭhuampui leh Lammual inkara kawngpui (via Chaltlang leh Ramhlun) leh a chhehvela bungraw dah hnawkte chu September 5, 2025 ral hma ngeia senghawi vek turin an hriattir. In sakna bungrua hrang hrang kawng kama dahte chu senghawi vek tur te, workshop leh dawrte pawh an hmunhma tifai tur leh an bungruate dawr chhunga seng lut vek turin an hriattir bawk.