Siahaah HIV Test Drive Campaign hawng

Siaha District AIDS Prevention & Control Committee chairman VL Hruaizela Khiangte, bawrhsap chuan nimin khan MADC Golden Hall-ah HIV chungchang inzirtirna leh thisen endik rûnpui kalpui tur, Intensified IEC Campaign & HIV Test Drive Campaign a hawng.

VL Hruaizela Khiangte chuan, HIV chungchang inzirtirna uar zawka district tana kalpui a ni dawn tih sawiin, "HIV/AIDS hlauhawm dan kan la chiang tawk lo niin a lang. HIV/AIDS chungchangah India ram pum huapin Mizoram hi kan chhuanawm loh em em a, Siaha district-ah vei thar an pung char char bawk a, Mizoram huapa lang pha kan ni hi a pawi em em a ni," a ti.

Inzirtirna kalpui tur chu chhawr ṭangkai a, a hre ve lote hriattirtgu ni ṭheuh turin Bawrhsap chuan kal khawmte a chah a, "Ramri hrûla awm kan nih avangin ruihhlo tih leh tawlhah nghawng ṭha lo tuar thei kan ni a, invenna kalpui a pawimawh," a ti a; zirlaite chu an ṭhiante vanga sualna ti chhin lo turin a chah.

Campaign hawnna inkhawmah hian Siahaa higher secondary school pali aṭangin zirlai leh zirtirtu mi 300 vel an tel a; Siaha District Hospital-a ICTC counsellor Zingia Hlychho-in HIV/AIDS chungchanga hriat tur pawimawhte a sawifiah a, Mental Health nurse Merilyne MS Mawii Beiho-in ruihhlo hman sual leh a kaihhnawih chungchang a sawi bawk.

Intensified IEC Campaign & HIV Test Drive Campaign-ah hian Siaha district-a khaw 25-ah September leh October thla chhung campaign neih tur a ni.