Kolasib district-a ram hectare 798-a zauah oil palm chîn mek a ni

Assembly deputy speaker Lalfamkima chuan nimin khan Kolasib Venglai Bazar kawtah Mega Oil Palm Plantation Drive puala loneitute hnena a thlawna sem tur oil palm ṭiak a vailiam. Kolasib district-ah mi 496-in ram hectare 798-a zauah oil palm an chîng mek.

Vailiam inkhawma tarlan danin, Kolasib leh Mamit district-ah Godrej Agrovet hnuaiah oil palm chìn a ni a, ram hectare 1,776-a zauah mi 1,030-in an chíng mek.

Kolasib district-ah mi 496-in ram hectare 798-a zauah an chíng a, hectare 313-ah a rah hralh theih tawh niin, hectare 485-ah a la sén thung. Sorkar kum kal mekah oil palm chíngtute'n cheng nuai 143 man vel an hralh tawh a, cheng nuai 300 man vel hralh beisei a ni.

Lalfamkima chuan, oil palm chu Mizorama sum chang thlai (commercial crop) zingah hlâwk ber pawl nia a hriat thu sawiin, "Oil palm ṭiak hi phun aṭanga kum li chhungin a rah a, leitu tur an awm nghal avangin innghahna tlak a ni. Thlai dangte angin a bo thu hlaah vênthâwn tur a awm lo a, a chi lei aṭanga rah a chhuah hnua enkawl zui thlengin sorkarin kawng hrang hrangin ṭanpuina a siam a ni," a ti a; oil palm hlawkzia chu a ching mekte'n an hre chiang tih a sawi.

ZPM sorkarah kut hnathawktute'n beiseina sang tak an nei tih sawiin Lalfamkima chuan, "An hnathawh a thlawn lo a ni tih an hmu tawh a, sorkarin kut hnathawktute hamṭhatna turin theihtawp a chhuah zel dawn," a ti a; mi hlawhtlingte taimakna entawna thawkrim turin oil palm chingtute a chah.

Oil Palm Plantation Drive-ah hian Kolasib bawrhsap Robert C Lalhmangaiha pawhin thu a sawi.