Mi 58 hnenah sangha ṭanpuina sem

Champhai District Fisheries Development Office chuan nimin khan IPR Auditorium-ah NFDB, Regional Centre Guwahati kaltlangin SC/ST beneficiaries 2025-26 te tan awareness/workshop' an buatsaih a; PMMSY 2023-24 aṭangin sangha khawitu mi 58 hnenah ṭanpuina Rs 75,600 ṭheuh hlan a ni.

Champhai district fisheries development officer Lalremsangpuii chuan, Champhai district-a sangha khawitute chu sangha tam zawk thar tur leh district páwna thawn chhuah tham thar thei tuma ṭan la turin a chah a, "Ṭanpuina in dawnte hi rinawm takin hmang u la, sum hman a nih dante uluk takin DFDO lam pawhin kan kalpui dawn," a ti a; NFDP registration ti vek tur leh harsatna an neihte department-ah hriattir turin sangha khawitute a chah.

Training-ah hian AFO Lalchhuanawma'n Indian Major Carp sangha khawi dan leh enkawl dan a zirtir a, AFO Lalmalsawma'n biofloc management leh sangha natna enkawl dan a zirtir. Fisheries department scheme hrang hrang PM-MKSSY, GIAS, NFDP, FIDF, PMMSY leh KCC chungchangte an hrilhfiah nghal bawk.

Champhai district-a sangha khawitu mi 58 hnenah PMMSY 2023-2024 kaltlangin sangha no khawina hmun siamna tur ṭanpuina Rs 75,600 ṭheuh pek a ni a, ṭanpuina pawisa hi a vaiin Rs 43,84,800 a ni.