Sum leh scheme chungchang inzirtir

Reserved Bank of India (RBI) chuan nimin khan Saitual Chhim Veng Presbyterian Kohhran Hall-ah 'Saturation Camp for Financial Inclusion Schemes' leh 'Re-KYC cum Field Level Financial Literacy Programme' an buatsaih a; Aizawla RBI general manager T Lhungdim-in hawngin, Saitual DC Lalngura Tlau-in a hmanpui.

Sum leh scheme chungchang inzirtirnaah hian PMJDY, PMJJBY, PMSBY leh APY scheme-a inziak lut thar tur leh KYC tihṭhat ngai mi eng emaw zat an tel a; Mizoram Rural Bank chairman Sheryl L Vanchhong, Mizoram Cooperative Apex Bank chief executive officer A Lallungmuana leh SLBC convenor Tusing te pawh an tel a ni.

T Lhungdim chuan, RBI, Aizawlin sum leh pai chungchang inzirtirna hmanrua Mizo ṭawnga lehlin te, camp buatsaih te, lungawi lohna awm hrang hrang chinfel te, hmasawnna hrang hrangte chhungkaw tin hnena thlen a nih theihte a ngaih pawimawh thu a sawi a, "Tuna KYC tih thar lehna hmalakna hmang hian customer-te'n PMJDY account leh social security scheme hrang hranga hamṭhatnate an dawn phah thei dawn a ni," a ti.