Kolasib dist-a bank CD ratio 59.46%

Kolasib District Consultative Committee (DCC) chu nimin khan DC conference hall-ah an ṭhu a, additional DC B Malsawmtluangi'n a kaihruai. April-June 2025 chhunga Kolasib district-a bank-te'n deposit an hmuh aṭanga loan an pek chhuah zat, credit deposit (CD) ratio 59.46% a nih thu tarlan a ni.

B Malsawmtluangi chuan, DCC member-te chu ram chhung mipui sum leh pai deh chhuah kawnga ṭanpuitu an nih thu sawiin, "Sum vawn dan leh hman dan zirtirtu pawimawh tak kan ni. Sorkar hmalakna tihhlawhtlinna kawngah pawh mawhphurhna lian tak kan kutah a awm," a ti.

Ṭhutkhawmah hian loneitute leh ran vulhtute hamṭhatna turte leh central leh state sorkar hnuaia sum kaihhnawih scheme hrang hrang - PMJDY, PMMY, KCC loan leh a dangte mipuite hnena ṭha taka a thlen dan turte sawiho a ni.

Lead bank district manager Thuamzamung Tunglut sawi danin, April-June 2025 quarter chhungin financial literacy campaign vawi 41 buatsaih a ni a, mipui 2,000 awm tlin lohna khua 29-ah banking facility ṭul zualte pek a ni.