Thla 3 chhunga sum hman tur ruahman Nuai 182381.44 House-ah pharh

Finance minister Lalsawta chuan nimin khan Assembly session-ah kumin August-October chhunga Mizoram sorkar sum hman tur ruahman Vote on Account cheng nuai 182381.44 a pharh. Lalsawta chuan, chhan hrang hrang vangin kum 2015-16 atana budget pumpui pharh theih a la ni lo tih sawiin, "Remchang hmasa berah regular budget pharh vat kan tum," a ti.

Finance Minister chuan Vote on Account pharh paha thu sawiin, Centrally Spnsored Scheme hrang hranga Central leh state sorkar sum intum sem dan tur bithliah chiang tak an la dawn loh avangin regular budget an pharh theih loh phah niin a sawi.
Lalsawta chuan, 14th. Fi­nance Commission-in chhiah tlingkhawm aṭanga state sorkar chanvo tur chu 32% aṭangin 42%-ah tisang mah se, hmarchhak state-te special category status nihna chu tihtawp a nih thu leh, chumi avang chuan Mizoram bakah, hmarchhak state dangte'n sum lamah harsatna an tawh phah thu a sawi a, "A chhan bulpui ber pawh CSS hrang hranga state sorkarin a do let vena chu tihsan a nih tak vang a ni. Keini ang state pachhe tan chuan a hmaa CSS kal kalpui ve ṭhinte pawh eng emaw zat chu kan kalpui zui thei lo mai thei," a ti.
Finance Minister chuan, hmarchhak state-te chuan ṭang rualin sorkar laipuiah special category status tinung leh turin an ngen thu leh chhanna an beisei reng thu a sawi a; North Eastern Council leh Ministry of Development of North Eastern Region aṭanga sum hmuh tur zat a la chian loh thu a sawi bawk.
Mizoram sorkarin thla thum chhunga sum a hman tur Finance Minister-in nimina House-a Vote on Account a pharh tak hi Rs. 18,23,81,44,000 a ni a; sum lama Mizoram dinhmun hrethiam chunga pawmpui turin House a ngen a ni. Hetih lai hian, kum 2015-16 chhunga Mizoram sorkar sum hman tur ruahman (total provision) chu Rs. 70,56,54,69,000 a ni thung.