KHAWTHLIR
Aadhar Card
Sorkar chuan thuchhuah siamin, Aizawl district-a Aadhar Card siam nana Biometric Enrolment la ti lo zawng zawngte chuan office hun chhungin Aizawl DC office-ah thla lak theih reng a nih thu a tarlang. Veng chhunga thla la ve lo tamna veng/khuate tan chuan Aizawl DC office-ah veng chhunga thlalak a nih theihna atan dilna thehluh theih a ni bawk.
Gram Sabha
Digital India Week pualin nimin khan village council member-te pualin Kolasib, Seling leh Serchhipah thil pawimawh chi hrang hrang inhrilhhriatna hun 'Special Gram Sabha' buatsaih a ni. Programme hi LAD bultum a ni a, sorkarin e-service a chhawpchhuah leh internet-te ṭangkai zawka mipuite'n an hman theih turte an inzirtir a ni.
Mi 15 man
New Market Police Beat Post-a in-charge C Lalhrilhkima chuan Vanglaini palai zawhna chhangin, January-June 2015 inkar chhunga New Market leh a chhehvelah rûkrûk kaihhnawihah mi 15 an man a, chung zinga pathum chu hmeichhia an nih thu a sawi. Thubuai an ziah luh zawng zawng chu 20 a nih thu leh, chargesheet 15 an thehluh tawh thu a sawi bawk.
Hrem ngei duh
Venghnuai Local Council leh tlawmngai pawl hrang hrang ṭhu khawm chuan, tun hnaia hnam dang mi pakhat ru botute zinga an veng mi pathum - Thomson Lalrambuatsaiha, Micky C Zohmingliana leh Lallianmawia te chu thuneitute'n an phu ang ngeiin a na thei ang berin hrem se an duh thu an tarlang a; tun hnuah ti tawh lo se an duh thu an sawi.
Medical officer
MPSC chuan nimin khan Home (Prison) department-a thawk tur medical officer (contract basis) lakna result a tichhuak a; HJ Lalnunpuia, Armed Veng leh Lalruatliana Pachuau, Serchhip AOC Vengte an tling.