CBI-in HSRP chhui an dilna Mizoram sorkarin an hnâwl

Shimnit Utsch-te'n Mizorama high security registration plate (HSRP) siam hna an kalpui dan Central Bureau of Investigation (CBI)-in chhui chian an dilna chu Mizoram sorkarin a hnâwl.

Road Transport secretary Vijay Chhibber chuan CBI hnenah Shimnit Utsch-te hnena contract an pek dan chhui chiang turin a ngen a; chumi kal zelah CBI chuan hmarchhak state pangate chu HSRP an kalpui danah thil dik lo a awm leh awm loh chhui chian phalsak tura ngenna a thawn a ni.

Vanglaini palai zawhna chhangin, Transport department hotute chuan, chhan hrang hrang avangin CBI ngenna hi hnawl a nih thu an sawi. CBI-in lehkha a thawn dang - Meghalaya, Sikkim, Nagaland leh Arunachal Pradesh-te pawhin CBI ngenna hi an chhang lo.

Shimnit Utsch-te hian HSRP vuah hna hi October, 2013 aṭangin an kalpui ṭan a, kumin kum tìr lam thleng khan lirthei 75,000 velah vuah a ni tawh. A tirah chuan lirthei zawng zawnga vuah tura tih ni mah se, kumin kum tìr khan lirthei hluiah chuan vuah ngei ngei tura tih a nih loh thu Transport minister John Rotluangliana'n a sawi a ni.