Laldenga thlànah zahna pangpar an dah

Nimin July 7 kha MNF dintu leh chief minister hlui Laldenga thih cham vawi 25-na a ni a, he ni pual hian nimin zing khan Treasury Square-a a thlanah MNF hruaitute'n zahna pangpar an dah.

MNF president Zoramthanga chuan, Laldenga'n a ngaih pawimawh Mizo nationalism chu ṭhangtharte'n an chhawm nun zel a pawimawh tih a sawi a, "Mizote hnam anga kan din chhuah theihna turin Pu Laldenga thil tumte tihlawhtling turin theihtawp kan chhuah a ngai. Remna thuthlung pawh state dang neih ve loh Mizo ram leh hnam himna tura inhung biknate siam a ni hian Pu Laldenga hmathlir thuizia a tifiah a ni," a ti.

Laldenga chu mi bik nia sawiin Zoram­thanga chuan, "Underground laia foreign ramte'n an dawnsawn ṭhin dan kha tih dan phung piah lam a ni fo. China ram kan tlawh ṭumin an foreign minister-in airport-ah an lo hmuak a, an hotupa Mou Tse Tung meuh pawhin inkhawm pawimawh a neihnaah dawhkan khat a kîlpui ṭhin," a ti a; Laldenga aia Aizawl hmun laia phûm tlak Mizote tana mi pawimawh an awm loh thu a sawi.

MNF President sawi danin, Laldenga a thih khan prime minister VP Singh chuan chawimawina sang 'state funeral'-a vui turin a ti a; Union minister George Fernandes leh minister hlui tam takin Mizoram thlengin an rawn zui a ni.

Laldenga hi July 11, 1927-ah Pukpui, Lunglei district-ah a piang a, kum 1957-ah Lalbiakdiki nen inneiin, fapa pahnih leh fanu pahnih an nei. Kum 1944-ah Bristish Indian Army a zawm a, kum 1959-ah Mizo National Famine Front dinin, Mizo National Front tih a nih hnuah president a ni zui a ni.

Kum 1990-ah Memorial Sloan Ke­terring Cancer Centre, London, Eng­land-ah thla thum enkawl a nih hnuah, July 7, 1990-ah a thi a ni.