Digital India Week khâr a ni

Nimin khan I&PR Audi­torium leh NIELIT-ah Digi­tal India Week kharna hun buatsaih a ni. I&PR Auditorium-ah hian I&CT minister Lal Thanzara hoa hun hman a ni a, week puala intihsiakna buatsaiha a tiṭhate hnenah lawmman sem a ni.

Lal Thanzara chuan tunlai khaw­vel ṭhang chho mekah hian Mizoram pawhin IT lamah hma a sawnin, khawvel ram changkangte pen rualin a pen ve zel tih a sawi a, "Khawvelin a kalpui tawh avangin helamah hian kan ngaihtuahna pawh senga rilru pawh kan pek tam a ṭul tawh a n," a ti.

NIELIT, Aizawl chuanan college-ah Digital India Week khârna hun hi an hmang a, Aizawl Municipal Council (AMC) chairman CT Zakhuma'n a hmanpui.

CT Zakhuma chuan, Digital India Week chuan information technology pawimawhna mi tin thinlunga tuh leh an ban phak tura a hmanruate chhawpsak a tum tih a sawi a, "Khawpui leh thingtlanga awmte'n engkim kan inpek tawn zung zung a pawimawh," a ti.

AMC executive councillor Rosiamngheta pawhin, mi­hring a inthlak danglam loh chuan 'change' a thleng thei lo tih sawiin, inthlak danglam ngam a ngaih thu a sawi a, zirlaite chu hmasawnna hma­chhawn ngam turin a chah.

Digital India Week khâr­naah hian chawhnu lamah ICT-in education, cyber security, digital literacy, benefits of digi­tal locket jeevan pramaan adhaar leh e-services tih thupui hmangin mithiamte'n thu an sawi.

NIELIT hian National Digital Literacy Programme hnuai­ah computer course hrang hrang - MCA, BCA, Dip­loma in Electronics and Telecommunication Engi­neering leh Diploma in Computer Science Enginee­ring a kalpui a; course hrang hrangah hian kum 2014-15 thleng khan mi 2,662-in an zir chhuak tawh a ni.