Mizoramah HIV+ve 10,093 an awm tawh MLA tinin AIDS do nan Rs.1,00,000 an pe dawn

Mizoramah April 2015 thleng khan HIV hrik pai mi 10,093 awmin, AIDS vangin mi 655 an thi tawh. Mizorama HIV/AIDS dona atan Mizoram MLA-te chuan Rs. 1,00,000 ṭheuh thawh an remti.

Mizoram State AIDS Control Society kaihhruaiin nimin khan As­sembly session zawh velah khan Assembly Recess Room-ah Legislative Forum on AIDS meeting neih a ni. MLA-te tan HIV/AIDS chanchin zirna buatsaih niin, session-a tel MLA-te an tel kim.

Meeting hi Health minister Lal Thanzara'n a kaihruai a, MSACS project director Dr Lalmalsawmi Sailo-in HIV/AIDS chungchanga Mizoram dinhmun a sawifiah a; HIV/AIDS donaa hmalak zel dan tur an sawiho nghal.

Dr Lalmalsawmi Sailo tarlan danin, October 1990-ah Mizoramah HIV hrik pâi an awm ṭan a, April 2015 thlenga chhinchhiah danin, thisen endik tawh mi 3,12,768 zinga 10,093-in HIV hrik an pâi. HIV hrik pai zingah mipat hmeichhiatna hman aṭanga kai tam berin, 69.28% an ni a; inchiuna aṭanga kai 24.57%, nu aṭanga nautea kai 3.60% leh chhan mumal hriat loha kai 2.56% an awm. Tun hnai kum thum chhung bikah, HIV hrik pai hmuhchhuah zinga 75% vel chu mipat hmeichhiatna aṭanga kai an ni.

Health secretary Lalhming­thanga sawi danin, India rama district-te chu HIV positive tam dan aṭangin category-ah ṭhen an ni a, Aizawl leh Champhai district-te chu a sang ber - category-A ah an awm. India ram state zingah Mizoram chu HIV+ve tamna ber pahnihna niin, HIV+ve chu 0.68% an ni a, pakhatna chu Nagaland (0.88%) niin, pathumna chu Manipur (0.64%) a ni.

MSACS Project Director chuan, Anti Retroviral Therapy (ART) Centre paruka HIV+ve inziak lut zat chu mi 8,465 an ni a, ART damdawi ei mek mi 3,718 an awm.

Meeting-ah hian MLA-te chuan HIV/AIDS donaa ṭan lak dan tur ṭha nia an hriatte an sawi a, kohhran aṭangin a dona uar zawka kalpui theih ṭhaa an hriat thu an sawi uar hle. MLA-te chuan HIV/AIDS dona atan Rs. 1,00,000 ṭheuh pek an remti tlang a, MLA Fund aṭanga pek tura ruahman niin, kum tina pek tur nge, term khatah vawi khat tih erawh chu la rêl fel turah an dah.

Legislative Forum on HIV/AIDS hi state tinah din tura tih a ni a, Mizoramah chuan July 27, 2005-ah din a ni. Nimina meeting chuan Legislative Forum on HIV/AIDS-a hruaitu turte ruat nghalin, chairman-ah Health minister Lal Thanzara leh secretary-ah Dr K Beichhua an ruat.