Legislative Assembly session tan a ni MLA ni tawh thite sunna hun hmang

Mizoram Legislative As­sembly pasarihna ṭhutkhawm vawi rukna chu nimin chawhma dar 10:30 khan Assembly House-ah ṭan a ni a, vawiin leh naktukah chhunzawma zawh a ni ang.

Nimina session ṭannaah hian sûnna hun hman hmasak ber a ni a, session hmasa leh tun session inkara House member ni tawh thi mi pahnih - Brig. T Sailo leh Lalnghenga te sûnna hun hman a ni. House leader Lal Thanhawla'n mi pahnih sûn turte chanchin a sawi. Chumi hnuah Finance minister Lalsawta'n thla thum chhunga Mizoram sum hman tur 'Vote on Account' a pharh.

Chief minister Lal Than­hawla chuan, Brig. T Sailo chu mi ropui a nih thu sawiin, MLA narân ni loin, Mizoram chief minister hlui a nih thu a sawi a; a hnathawhte chu Mizo mipuite'n an chhawr nasat thu leh hnathawh ṭhat vangin kum 1999-ah Padma Shree a dawn hial thu a sawi.

Lal Thanhawla chuan, T Sailo chu rambuai laia sipaite laka Mizote thlavâng hauhtu a nih thu a sawi a, "Ngaihdan inan loh cháng awm mah se, ram tan kan thawkho a, a hun tawp thlengin ram leh hnam tan a ngaihtuahna a seng a ni... A hnathawhte, Zoram tana a tihte hi Mizo mipuite'n kan hre reng dawn a ni, " a ti.

Lal Thanhawla chuan, MLA hlui Lalnghenga chu mi zaidam, takna ngaina, tum ruh leh a thil tih tawh ti tlat mi a nih thu te, khawtlang tana theihtawp chhuah ṭhin a nih thu te, rambuai laiin remna palai hna nasa taka thawktu a nih thute a sawi.

Opposition leader Vanlal­zawma chuan, Brig. T Sailo chu a ui thu sawiin, a hnathawhte avang­in Mizoramin a hriat reng tur thu a sawi a, "Six basic needs a tihna hi a ropui a, tu pawh sorkar se kan tih tur, a bak awm chuang lo a ni," a ti a; hruaitu ropui a nih thu leh Pathianin Mizoram tana Ṭhenphunga Sailo a pe chu Mizote tan vanneihna a nih thu a sawi. Lalnghenga pawh a ui thu leh a chhungte a tawrhpui thu a sawi bawk.

Brig. T Sailo leh Lalnghenga chungchangah hian House member dang pali - Lt.Col. ZS Zuala, Lalthanliana, PC Zoram Sangliana leh Lalruatkima ten thu an sawi a; chumi hnuah anmahni sûn nan minute khat chhung ngawi rengin an ding a ni.

Brig. T Sailo hi January 1, 1922-ah Ṭhuampui, Lunglei district-ah a piang a, kum 1942-ah British Army a zawm a, kum 1966-ah Brigadier-ah a kai a, Mizo zinga sipai brigadier hmasa ber a ni. Kum 1946-ah PS Dahrawka fanu Thansiami nen an innei a, fa pali an nei.

Ṭhenphunga hian March 17, 1975-ah People's Conference party a din a, kum 1978 MLA inthlanah sorkarna changin, chief minister a ni a; kum 1979 inthlanah PC party sorkar lehin a ṭum hnihna atan chief minister a ni leh a, kum 1984 thleng CM a ni. Kum 1984 inthlanah pawh MLA-ah thlan tlin leh a ni a, a party erawh an sorkar zo lo. Kum 1988 leh 2008-ah MLA-ah thlan tlin a ni leh a, kum 2013-a a term a tawp hnuah politics a chawlhsan. March 27, 2015, chawhma dar 11:50-ah New Life Hospital-ah a thi a ni.

Lalnghenga hi Jnuary 2, 1944-ah Saichal khuaa puang a ni a, a nupui Lianhliri nen fa pali an nei. Kum 1966-ah MNF a zawm a, kum 1979 inthlanah North vanlaiphai bialah PC ticket-in a ding a, mahse a tling lo. Kum 1982-ah N.Vanlaiphai bialah a ding leh a, thlan tlin a ni. June 29, 2015-ah zunthlum vangin a thi.

Nimina Assembly session-ah hian member pathum - H Zothangliana, K Sangṭhuama leh Lalrinliana Sailo te remchan lohna vangin an kal lo a; Finance Minister-in Vote on Account a pharh hnuah tihtawp a ni.