MSU-in coaching academy khar tum

MSU chuan thuchhuah siamin, Vaji Rao IAS Academy, Vaivakawn a mi chu phalna neih ngai pakhatmah an neih loh avangin vawiin aṭanga tiamchin awm loa an kharsak tur thu an tarlang.

MSU tarlan danin, Vaji Rao IAS Academy hi rinhlehna an neih avangin vawi tamtak a lo thli thlai tawh a, June 4,2015 khan Vaivakawn Police Station ah FIR a lo thehlut a ni. Police-te'n theih tawpa an chhui zui hnuah a fel famkim tawk lohna an hmu a ni. Mizo zirlaite'n an tawrh theihna kawng hrang hrang ven thawn thuah MSU hruaitute, police officer-te leh academy neitute nen sawihoin, coaching academy din tura phalna neih ngai hrang hrangte nei thuai turin academy neitute hrilh hriat an ni.

Phalna neih ngai neih kim hma chu admission thar pawh la tawh lo tur leh advertisement pawh titawp nghal turin hriattir an ni. Mah se, admission leh advertisement a la kalpui reng avangin MSU chuan Mizo zirlaite hnamdang zawkin mahni ramchhung ngeia an hmusitna lian takah ngaiin MSU chuan academy hi khar sak turin thutlukna a siam a ni.