HM Zira'n Aizawla inrukbo dan a sawifiah

Home minister R Lalzirliana chuan, July 4, 2015 zan dar 7:30 vela Zarkawta khawsa mek Aklas Uddin (30) s/o Abdul Manik hruai botute chu Court-ah hruai a ni tawh a, police-in an la kawl mek thu House a hrilh.

R Lalzirliana hian nimin khan Assembly session-ah special mention hun hmangin, mi paliin Aklas Uddin an rûk bo dan leh man an nih dan a sawifiah. Ru botute'n motor an hman, MZ-01 G-3456 tih chu registration lem a nih thu leh, ru botute chu July 5-ah Lengpui khawtlangin manin, Sairang Police Station-ah an hlan thu a sawi.

Home Minister sawi danin, ru botute zinga mi - Thompson Lalbuatsaiha (29) s/o C Lalngaihawma, Venghnuai leh Micky C Zohmingliana (29) s/o C Ringzuala, Venghnuaite chu Lengpui khawtlang kut aṭangin police-in an la nghal a; Lallianmawia (32) s/o PT Kaia chu an inah an man leh a, Robert Lalmuanpuia s/o K Rozama erawh chu police-in an la zawng mek thung.

Mi rubotute chuan Mizo Youth Service Corps mi leh sa an nih thu police-te an hrilh. Mizo Youth Service Corps hi Mizoram sorkarah register niin, an registration-a an director chu C Dothanga, IPS (Rtd.) a ni.