CSS-a thawkte a huhoin an châwl dawn

Department hrang hranga CSS hnuaia thawkte intêlkhawm, All Mizoram CSS Employees Coordination Committee (AMCECC) chuan, sorkara an phût hrang hrangte tipuitling turin Mizoram sorkar an phût a; sorkarin a tihhlawhtlin loh chuan September 9-11, 2025 chhung a huhoa chawlh (mass casual leave) lak an tum thu an puang.

AMCECC hian nimin khan Youth Recreation Centre-ah General Body Meeting an nei a, an chairman Malsawmtluanga Hauhnar-in a kaihruai a, CSS hnuaia thawk mi 1,000 chuang an tel niin an sawi. Mizoram sorkara an dinhmun siamṭhatna tura an hmalakna te, state sorkar aṭanga thu lawmawm an neih theih loh vanga an kal zel dan turte an sawiho a ni.

AMCECC General Body Meeting chuan resolution siamin, an thil phûtte an tarlang a, "Tihhlawhtlin ngei kan phût a, min tihhlawhtlinsak loh chuan September 9, 10, 11 chhung hian mass casual leave lak ni se kan ti. Hemi chhunga kan duh anga sorkarin hma min laksak loh chuan kan kal zel dan tur hi ngaih-tuah leh a ni ang," an ti.

Mizoram sorkar hnuaiah CSS hnuaia thawk mi 10,000 chuang an awm mek a, AMCECC-ah hian department hrang hrang aṭangin pawl 16 an tel a ni.

AMCECC tarlan danin, CSS hnuaia thawkte state sorkara dah nghehna tur, Regularisation of CSS Employees Scheme a taka hman duhin AMCECC hian lungawi lohna an lo lantir tawh a; sorkar hotute nen inbiain, inremna an nei a, state sorkar thurawn angin representation pawh an thehlut tawh.

CSS HNUAIA THAWKTE RESOLUTION

* CSS employee-te’n Regularisation Scheme kan hman ve ngei theih nan siam rem ngai min siam remsak tura sorkarin ngaihtuahna a sêng miah lo leh, DPAR Minister thurawn anga AMCECC-in representation 19.05.2025-a kan thehluh tawh lehkha min tihbosak leh, a thlenna tur official hnen a thleng lo hi mak kan ti. Regularisation of CSS Employees Scheme, 2024 a taka kan hman ngei theih nan representation kan thehluh hi rang taka min ngaihtuahsak a, min tihhlawhtlinsak turin sorkar kan phût.

* Govt. of Mizoram hnuaia thawk CSS employee-te'n Regularisation of CSS Employees Scheme, 2024 hnuaia department hrang hrang proposal an hnâwl zel laia CSS pawh ni lo, Health department hnuaia thawk health worker mi 31, MR skilled-II, PE-a convert-te he dan hmanga an dah nghet hi mak kan ti a, induhsakna uchuak hi kan ngaithiam loin, tun hnuah thleng tawh lo se kan ti. He appointment hi sorkarin cancel ngei rawh se.

* CSS hnuaia thawkte ‘dan lo anga lak’ tia kan Chief Minister-in 2025 Independence Day lawmnaa a sawi hi nâ kan ti. CSS hnuaia thawkte hi dan ang thlapa lak kan ni a, dan lo anga lak kan awm chuan, dan lo anga latute chu zawng chhuaka action na taka lak ni rawh se.