Covid-19 inkaihhruaina thar SDMA SEC duan turin dah a ni
Nimin khan Secretariat Conference Hall-ah Health minister Dr R Lalthangliana hoin sorkar hotute'n Mizorama Covid-19 dinhmun an thlir a; Covid-19 vanga nun dan tur inkaihhruaina - Standard Operating Procedure (SOP) hman mek kalpui chhunzawm tur a nih leh nih loh chungchanga ruahmanna siam chu State Disaster Management Authority (SDMA) hnuaia State Executive Committee (SEC) kutah an dah.
Ṭhutkhawmah hian Home minister Lalchamliana, MLA Dr ZR Thiamsanga, chief secretary Lalnunmawia Chuaungo, Additional DGP, Covid-19 donaa hma latu department hotu te, Indian Medical Association (IMA) Mizoram leh Mizoram Kohhran Hruaitute Committee (MKHC) aiawhte an tel.
Thlirhonaah hian, hunpui vuakvêtah mipuiin sorkar ruahmanna an zawm ṭhat avangin tualchhunga hri kái thar an tlem niin an sawi a; mipuiin thu an awihnaah leh hripui donaa thawktu sorkar hnathawk, tlawmngai pawl, task force leh kohhran hruaitute chungah lawmthu an sawi.
Hripui chungchanga hunpui vualvêta Mizoram dinhmun dik tak erawh chu kar leh tàwp lamah a hriat ṭan chauh dawn niin an sawi a; chuvang chuan, SOP hman mek kalpui chhunzawm a nih dawn leh dawn loh bakah, thil pawimawh hmanhmawhthlak zualte ngaihtuaha duang turin SDMA hnuaia SEC an ruat a ni.
Covid-19 laka invenna (vaccine) dawng hmasa tur chungchangah state sorkarin thuneihna a neih loh te, sorkar laipuiin a din National Expert Group on Vaccine Administration for COVID-19 (NEGVAC) ruahmanna zawm tur a nih thute an tarlang.
Tarlan danin, vaccine dawng tur thunna database-a tel lote chu vaccine pek theih an ni dawn lo. Vaccine inpek dan tihchhinna 'dry run' chu India rama state khawpuiah neih vek tur a nih avangin Aizawlah chuan January 2 khan neih a ni a; January 8, Zirtawpni hian district khawpui tinah buatsaih leh tum a ni.
Covid-19 donaa thawk tura tlawmngaia inpe (volunteer) mi 687 hnenah lawmman pek a nih tawh thu tarlan a ni. Volunteer-te chu December 2020 thlenga rawih tura tih a nih laiin, Covid-19 vaccine sem hunah thawktu mamawhna a nasat dawn avang leh inthlahdah loa ṭan lâk zui zel a ṭula a lan avangin March 2021 thlenga thawhtir chhunzawm turin meeting chuan an rawt a; thutlukna erawh chu sorkar hotute'n an siam ang.