Lungleiah state university dah a nih theih nan Lunglei MJA-in hmalak rêl

MJA, Lunglei District chuan nimin khan Chhimbial Chhantu-in state university din tur Lungleiah dah a nih theih nan a hnarkaitua ṭang a, theihtawp chhuaha hma la tura an ngenna an ngaihtuah a; ngenna chu pawmin, theihtawp chhuaha hmalak an rêl.

Ṭhutkhawm kaihruaitu Lunglei MJA president H Lalthansanga chuan, Chhimbial Chhantu aṭanga ngenna an hmuhah ngun taka ngaihtuahna sêng turin member-te a chah a; zau taka sawiho a ni.

Lunglei MJA chuan, MJA chu sorkar laka thil ngen leh ngiat neia thil nawr chiam chu an tih tur a ni lo chungin, motto-ah 'Service to the people' tih a nih angin, state university chungchangah Lunglei leh chhim bial tan thil pawimawh a nih avangin hmalak an rel thlu ta a ni tih an tarlang.

MJA member-te chuan, Lunglei leh chhim lam tan state university chu an mamawh a, nakin zelah tu leh fate tana ṭangkai tak tur a nih thu an sawi a; sorkar lakah pangchang taka ngen chu an chanvo a ni a, theihtawp chhuaha ṭangruala ngen ni se, tiin an rel a ni.