KHAWTHLIR

Aizawl District Disaster Management Authority chuan nimin khan thuchhuah siamin, ram dang, a bikin United Kingdom aṭanga Mizorama hawte chu home quarantine phalsak lo tur leh dilpui lo turin local/village task force-te a hriattir. UK-ah Covid-19 hri thar, hlauhawm zawk leh kài awlsam zawk a lèn avangin ram dang aṭanga Mizorama rawn hawte chu a bika buatsaih quarantine centre-ah khung hran tur an ni.

Lengzem chanchinbu, January 2021 thlaa chhuak tur chu January 11-ah tihchhuah tum ni mah se, nimin zinga swab sample endikah Lengzem enditor-te chhungkuaah Covid-19 vei an awm tih hmuh chhuah a nih avangin a chhuah hun sawn hlat a ni. Lengzem editor Vanneihtluanga chuan, "Lengzem January 2021 hi January 7-a chhuah turin peih vek tawh mah ila, thehdarh rih loh a dik zawkin kan hria a, kan chhuah tlai lehzual dawn ta a ni. Min hriatthiamna kan ngen e," a ti.

Khawzawl SP PC Lalchunglura chuan thupek chhuahin, Khawzawl leh Champhai inkar kawngpui siam mek a nih avangin lirthei tlân hun a bituk. Thupek ang chuan, zing dar 9:30 leh chhun dar 12:30 inkarah lirthei tlan phal a ni lo a, chhun dar 12:30 aṭanga chawhnu 1:30 inkarah kawng hawn a ni ang. Chawhnu dar 1:30 aṭanga tlai dar 4:30 inkarah khâr leh tur niin, tlai dar 4:30 aṭanga a tuk zing dar 9:30 thleng hawn leh a ni ang.

Robert Romawia Royte chuan nimin zing khan department officer-te nen MSSC Sports Complex, Republic Venga futsal ground siam dan tur a enfiah a; engineer-te'n an teh hnuah standard middle size futsal ground leng theia ngaih a ni. Minister hian MSSC Sports Complex chhunga cricket pitch leh volleyball court siamna hmun turte 

a en bawk a, drawing siam turin MSSC engineer-te a hriattir nghal a ni.