Hlawh lak theih loh vangin Zirtirtute Ni hmang dawn lo

Federation of Mizoram Samagra Employee (FEMSE) chuan thuchhuah siamin, Samagra Shiksha hnuaia thawkte'n kumina Zirtirtute Ni (Teacher's Day) thlen hma ngeia hlawh lak an phût a hlawhtlin loh avangin, vawiinah Zirtirtute Ni (September 5) an hman ve dawn loh thu an tarlang.

FEMSE chuan, Zirtirtute Ni thlen hma ngeia an thla hnih hlawh (July leh August) pe tura sorkara an thlenin awmzia a nei lo tih an tarlang a, "August 22, 2025-a council meeting-a kan rel tawh angin, hreh tak chungin Samagra Shiksha hnuaia thawkte'n Zirtirtute Ni sorkarin hman tura a tih hi kan hmang ve thei dawn ta lo," an ti.

Samagra Shiksha hnuaia thawkte chu an hlawh a beitham a, regular takin hlawh an la thei lo fo ṭhin tih tarlangin FEMSE chuan, "Hetiang hi kan nih avangin regular taka hlawh min pe turin sorkar kan phût tlat a ni," an ti a; hlawh an lak mumal loh fo chhanah, a mawhphurtute chhui chhuak a, a ṭul anga hma la turin thuneitute an phût.

FEMSE chuan, Samagra Shiksha hnuaia thawkte chu Zirtirtute Ni hmang lo turin an hriattir a; Zirtirtute Ni an hman dawn loh chungchangah hian an dinhmun hrethiama hriatpui turin an thawhpui zirtirtu te, zirlai te, zirlai nu leh pate leh mipui an ngen bawk.