KHAWTHLIR

Thisen pe

Modern English Higher Secondary School chuan nimin khan Model Blood Bank, Civil Hospital, Aizawlah thisen unit 26 an pe a, petute mipa 23 leh hmeichhia pathum an ni.

Phûm hnan tum

Republic Veng Branch YMA chuan thuchhuah siamin, an veng thlanmuala enkawltu mumal awm tawh lo thlânte November 2025 ral hmaa tifai tur leh chhinchhiahna ṭha tak siam turin mitthi chhungte an chah. November 2025 hnua enkawltu nei lo, tu thlan nge tih hriat lohte chu inphûm nan an hman zui dawn thu an tarlang a ni.

Ruihhlo do beihpui thlak tur sawiho

Kolasib district bawrhsap Robert C Lalhmangaiha kaihhruaiin nimin khan DC conference hall-ah Mizorama ruihhlo do beihpui thlakna, Operation Against Trafficking and Use of Drugs and Narcotics kalpui dan tur rel a ni a; a ṭul angin training buatsaih ni se, an ti. Ṭhutkhawmah hian Kolasib SP David H Lalthangliana leh Excise & Narcotics Assistant Commissioner bakah, VC leh YMA aiawhte an tel a ni.

AMC inthlan atan RO leh ARO riat

Aizawl Municipal Corporation inthlan awm tura mawhphurtu tur returning officer leh assistant returning officer turte ruat an ni. RO atana hian ATI joint director Lalhmansanga, Aizawl DRDO project director Lalnundika, Mizoram Youth Commission secretary V Lalmuanpuii leh Aizawl additional DC Zoramsiama Hmar te ruat niin, ward an chan turte pawh ruat nghal a ni a; ARO atan mi pariat ruat a ni bawk.

HIV Test Drive rel

Serchhip district bawrhsap Paul L Khuma kaihhruaiin nimin khan sorkar hotute leh khawtlang hruaitute an ṭhukhawm a, HIV/AIDS chungchang inzirtir beihpui thlakna, Intensified IEC Campaign cum HIV Test Drive Campaign chu September 16, 2025-ah hawn an rel. Campaign chhungin Serchhip district-a khaw 27-ah HIV/AIDS chungchang inzirtirna kalpui ni se, an ti.

AR-in silai man

Assam Rifles-te chuan September 2, Thawhlehni khan Siaha district-a Theiva khuaa lirthei an enfiahnaah mi pathum hnen aṭangin G3 Rifle leh magazine pakhat an man a, Tuipang Police station-ah an hlan. Thawhlehni vek khan Lawngtlai district-a Chamdur-P khuaah mi pakhat hnen aṭangin .22 air carbine pakhat, .22 single barrel miniature rifle pakhat bakah, magazines leh silai mu an man bawk a, Lawngtlai PS-ah an hlan a ni.

Teachers' Day DIET-in an hmang

District Institute of Education & Training (DIET), Aizawl chuan nimin khan Dawrpui Multipurpose Hall-ah Teachers' Day (September 5) an hmang. Kumina State Teacher Awardee dawngtu mi pathum Larinkima, R Vanlalhluna leh Lalrinsangi Chawngthu te chu khuallian an ni a, thu an sawi. DIET, Aizawl principal H Lalfakzuala'n Teacher's Day thuchah a sawi bawk. Aizawl DIET-ah hian B.Ed. zirlai 100 leh D.El.Ed. zirlai 240 an awm mek a ni.