Minister-in ambulance pariat a vailiam

Sorkar damdawi-ina dah National Ambulance Service (NAS) aṭanga ruahman 102 Ambulance pariat chu nimin khan Health & Family Welfare minister Lalrinpuii'n MINECO aṭangin a vailiam.

102 Ambulance-te hi damdawi-in pariat - Chawngte CHC, Sakawrdai CHC, Ngopa CHC, Bunghmun South PHC, Khawbung PHC, Ṭawipui PHC, West Phaileng PHC leh Rawpuichhip PHC tea hman tur a ni.

Health Minister chuan, NAS chu National Health Mission (NHM) hnuaia programme pakhat, kum 2013-a ṭan a nih thu sawiin, "Nau nei turte'n thianghlim leh hrisel taka sorkar damdawi-ina nau an neih theih te, nausen damlote damdawi-in lama kal lam leh haw lam phurh kual zung zung theih te, damlo enkawl hmanhmawh ngaite damdawi-ina phurh nghal zung zung theihte chu a thil tum ber a ni," a ti.

NAS hnuaiah Mizoramah ambulance 62 a awm mek tih sawiin Lalrinpuii chuan, "District hrang hranga sorkar damdawi-in 59-ah dah a ni a, NHM hnuaia call centre 102 aṭanga darkar 24 chhung enkawl (monitor) an ni," a ti a; ambulance-te chu a upat tawh hlawm avangin lirthei tharin a tahtawla thlak zel tum a nih thu a sawi.

Ambulance vailiamna inkhawmah hian HFW department-a official-te an tel a; Health secretary H Lalengmawia'n kaihruaiin, NAS state nodal officer Dr Joseph Lalluaia'n 102 ambulance chungchang a sawifiah.

Kum 2005 khan India ramah National Rural Health Mission (NRHM) kalpui ṭan niin, Mizoramah pawh kalpui ve nghal a ni a, kum 2013 khan thingtlang chauh ni loin, khawpui pawh huamtir niin, National Health Mission tia thlak a ni.