Cooperatives Awareness Programme buatsaih
Cooperation minister PC Vanlalruata hoin nimin khan Govt Aizawl College conference hall, Mualpuiaah International Year of Cooperatives 2025 pualin Cooperatives Awareness Programme hman a ni a; Minister chuan, zirlaite chu cooperative kaltlanga mahni kea ding thei tura rilru leh ngaihtuahna seng turin a chah.
PC Vanlalruata chuan, kumin International Year of Cooperatives thupui chu 'Cooperatives build a better world' tih a nih thu sawiin, "Tunlai khawvelah sorkar hna a vâng a, mahni kea dinna tur kawng kan dap a ngai. Mahnia eizawnna insiam chauh ni loin, mi dang tana eizawnna siamsaktu ni thei tur khawpa kan taimak a, kan inchhiar zau a, kan huaisen a ngai," a ti a; cooperative kaltlanga mahnia eizawnna kawng dap tum tura chahin, chutiang mite tan chuan Bâna Kaih (Handholding) scheme a awm thu a sawi.
Year of Cooperatives pualin Cooperation department-in Mizoram-ah thil chhenfakawm eng emaw tal thlentir a tum thu sawiin Minister chuan, college zirlaite chu cooperative bel chiang turin a chah a, "Cooperative hmang hian Mizoram ṭha zawk siam i tum ang u. Ṭhalai lehkhathiam zawk leh viak ṭha zawkte hi cooperative movement-ah hian engtin nge an lo tui ve theih ang tih ngaihtuahin awareness campaign-te kalpui a ni," a ti a, cooperative movement chawi lar nan college zirlaite tan essay inziahsiak an buatsaih mek thu a sawi bawk.
Awareness prog-ramme hi Cooperation registrar John LT Sanga'n a kaihruai a, Cooperation secretary Udit Prakash Rai pawhin thu a sawi. Cooperation assistant registrar Lalrinmawia leh Mizoram State Cooperative Union field education officer R Lalthlengliana ten zirlaite chu coope-rative movement chungchang an zirtir a ni.