Larsapin Bharat Darshan Tour a vailiam

Governor Gen. Dr Vijay Kumar Singh chuan nimin khan Ministry of Home Affairs (MHA) hmalaknaa Border Security Force (BSF) ruahman Bharat Darshan Tour hmanga Delhi-a zin tur zirlai 100, zirtirtu pariat leh tour guide-te chu Raj Bhavan aṭangin a vailiam.

Larsap chuan, MHA leh BSF hmalaknaa Mizoram zirlai 100 leh zirtirtu pariat tana Bharat Darshan Tour buatsaih a ni chu ṭha a tih thu a sawi a, "India ram hi ram zau tak, hnam ziarâng, ṭawng leh mi hrang hrang awmna a ni a, mahse, ram inpumkhat leh inlungrual tak kan ni," a ti a; Tour-a telte chu an zinna aṭangin thil tam tak an zir dawn tih sawiin, zawhna leh hriat duh an neihte inthlahrung loa zâwt zel tur leh Mizoram tana hmasawnna thil ṭha eng emaw tal hawn tum turin a chah.

Bharat Darshan Tour-a kal tur hian Aizawl, Lunglei, Mamit leh Saitual district-a sikul pariat aṭangin zirlai 100 leh zirtirtu pariat thlan a ni a; September 3-8, 2025 chhung awh tur niin, Delhi-a cultural & heritage hmun te, sorkar pisa leh museum-te an tlawh dawn a, MHA hotute nen an inkâwm bawk ang.

BSF Frontier Headquarters, Silchar DIG (G) Ahsan Sahedi sawi danin, BSF hian ramri venhim bakah, ram inpumkhat nan hma an la ṭhin a, ramri depa awmte tan Bharat Darshan Tour an buatsaih ṭhin. Tun ṭuma tour an buatsaih hi Mizorama an buatsaih hmasak ber a ni.