COVID-19: Mizoram dinhmun Hripui vei mi 15 hmuh belh a ni

January 5, Thawhlehni khan Mizoramah Covid-19 vei mi 13 hmuh chhuah a ni a, natna (Covid-19 symptom) lang mi paruk leh tualchhunga kái mi paruk an awm. Hriat theih chinah nimin khan mi pahnih hmuh belh a ni bawk. Nimin vêk khan hripui laka fihlim tawh mi pasarih chhuahtir an ni thung.

Thawhlehnia Covid-19 vei hmuh chhuahte chu mipa pakua leh hmeichhia pali an ni a; ZMC laboratory-a hmuh mi pasarih leh Rapid Antigen Test (RAT) hmanga hmuh mi paruk an ni. TrueNAT-PCR hmanga endik zingah hripui vei an awm lo.

Nimin khan RAT hmanga endikah Chanmari, Aizawla nupa tuak khat chu Covid-19 vei an ni tih hmuh chhuah an ni a, hri an kaina hriat a ni lo a, an kaihhnawihte chhui zui nghal a ni. Anni nen hian Mizorama hripui vei hmuh chhuah tawh chu mi 4,249 an ni.

Nimin khan hripui laka fihlim tawh mi pasarih chu enkawlna hmun aṭangin chhuahtir an ni a; SRH-ZMC leh Lunglei Sazaikawn CCC aṭangin mi pakhat ve ve, ITI, Aizawl CCC aṭangin mi pahnih leh Lawngtlai CCC aṭangin mi pathum an chhuak.

Mizorama Covid-19 vei hmuh chhuah tawh chu mi 4,249 an ni a, mipa 3,120 leh hmeichhia 1,129 an ni. Nimin tlai dar 5 thleng khan damin mi 4,160 (97.90%) chhuahtir an ni tawh a, mi pariat (0.19%) thi tawhin, enkawl mek mi 81 (1.91%) an awm.

January 5, Thawhlehni khan ZMC laboratory-ah swab sample 351, TrueNAT-PCR hmangin district parukah sample 115 leh RAT hmangin district pasarihah sample 165 endik a ni a, a vaiin sample 873 a ni. Covid-19 vei mi 13 hmuh chhuah chu endik zat aṭangin 1.50% a tling.

Mizoramah swab sample 1,83,145 endik a ni tawh a, chu'ng aṭang chuan Covid-19 positive mi 4,249 hmuh chhuah niin, endik zat aṭangin 2.32% a ni.

Covid-19 vei hmuh chhuah tawh mi 4,249 zinga mi 2,010 chu Mizoram chhunga kái chhâwng an ni a; mi 2,239 chu Mizoram páwn aṭanga an rawn luh hnua hmuh chhuah an ni thung.

Sorkar thuchhuah tarlan danin, ZMC laboratory-a hmuh chhuahte chu mipa paruk leh hmeichhia pakhat, kum 22-63 inkar an ni a, Aizawl district-a swab sample lak vek an ni. An zingah tualchhunga kai pakhat a tel a, symptom nei an awm lo.

Tuikhuahtlang - 1: Hmeichhia kum 63, tun hnaia Guwahati aṭanga haw, home quarantine mek, symptom nei lo, natna dang nei sa.

Falkawn - 1: Mipa kum 35, home quarantine lai, symptom nei lo.

Salem Veng - 1: Mipa kum 36, Delhi aṭanga rawn lut, home quanrantine lai, symptom nei lo.

SLT Infracon - 2: Mipa kum 22 & 32, Bihar aṭanga rawn lut, SLT Infracon Pvt.Ltd. camp, Maubuanga inkhung lai, symptom nei lo.

BSF - 1: Mipa kum 33, Delhi aṭanga rawn lut, quarantine facility-a awm mek, symptom nei lo.

Assam Rifles - 1: Mipa kum 33, 46 Assam Rifles sipai, Kolkata aṭanga rawn lut, Zokhawsanga AR hmuna inkhung lai, symptom nei lo.

Maubawk - 6: Mipa kum 10, 11 & 15 leh hmeichhia kum 32 & 43 (pahnih); tualchhunga kái, January 4-a +ve hmuh tawh chenpuite, kàina hriat chian loh, symptom nei vek.