Plastic ip hralh leh leiah fimkhur turin ngen

Mizoram Pollution Control Board (MPCB) chuan ngenna tichhuakin, tunlaiin plastic ip ṭawih thei anga zawrh, endikna paltlang lo leh ṭawih ṭha thei lo a awm nual tih hriat a nih thu an tarlang a; plastic ip hralh leh lei chungchangah fimkhur turin mipui an ngen.

MPCB chuan, plastic ip siamtu zingah dan dik loa siam ṭhin company dik lo 12 chhinchhiah an nih thu sawiin, "Central Pollution Control Board-in a chhinchhiah (black-list)-te chu MPCB website-ah en theih a ni," an ti.

Plastic ṭawih thei lo, ṭawih thei anga zawrh, hralh leh lei chungchangah MPCB chuan fimkhur turin mipui an ngen a; a siamtu company hming leh Pollution Control Board-te phalna certificate number chuang chauh hman phal a ni tih an tarlang. Plastic ip ṭawih thei (compostable plastic carry bag) siamtute chu state PCB-ah inziak lutin phalna an la vek tur a nih thu an tarlang bawk.