Truck neitute'n Mizoram chhungah State dang truck inhlawh an phal lo

Mizoram Truck Owners' Association (MTOA) chuan thu-chhuah siamin, Mizoram chhungah state dang truck-te bungraw phura an inhlawh an remti tawh dawn lo tih an tarlang.

MTOA chuan, Mizoram chhunga an inhlawhna chungchang an ngaihtuah thu tarlangin, "Kan state chhunga kan inhlawhfâk vena turah state dang truck an rawn inhlawh sup sup mai hi a pawi kan ti. State danga kan inhlawhfâk theih loh laia kan rama hnam dang an rawn inhlawh hian commercial vehicle-a inchîm ral a hlauhawmin kan hria," an ti.

State dang truck Mizorama inhlawh an phal dawn tawh loh thu sawiin MTOA chuan, "State dang truck leh a chhawr ṭhinte'n min zahsak kan beisei," an ti. An thil tum hian state páwn aṭanga bungraw rawn lut leh Mizoram aṭanga state danga bungraw chhuak turte a huam lo.

Vanglaini palai zawhna chhangin MTOA hruaitute chuan, kuhva rah phur ṭhinte'n hnam dang truck nen an inmawngzawm avangin state páwn truck an hman nasat thu a sawi a, "A rate chungchangah pawh inremna kan siam a, mahse, state dang truck an hmang zel tho. Sumdawnna lian thamah state dang truck an hmang nasa bawk. Sorkar lam chuan min hmang ṭha a, harsatna kan nei lo," an ti.