Benificiary záwngin a theih angin kan kal dawn - CM Zoramthanga

Chief minister Zoramthanga chuan, Socio Economic Development Programme (SEDP) hnuaiah a theih ang angin benificiary záwnga an kal tur thu a sawi a, "A ṭhen chu cheng nuai thumin a daih chi a ni lo," a ti.

Tun hnaia Vanglaini palaiin a kawmnaah Chief Minister chuan, "A theih ang angin benificiary záwnga kal kan tum. Benificiary type a awm a; entirna atan - rua phun dawn chuan mahni lo a ngai a, vawk vulh dawn pawhin inṭâwm dual dual chi a ni lo," a ti a, felfai taka benificiary chi leh chi lote thliar tum a nih thu a sawi.

CM Zoramthanga chuan, Rs. 3,00,000 an sawi ṭhin thu sawiin, "Nuai thum tling loa tihhlawhtlin theihte a awm ang. A ṭhen chu nuai thumin a daih chi a ni lo. Kan sum tam ber chu Delhi-a mi a ni a, project kan siam dawn. A ṭhenah chuan a pawisaa pek chi, a ṭhenah chuan pawisa loa pek chite a awm dawn a ni," a ti.