Kum 2020 chhungin ACB-in Complaint pariat an dawng

Eirûk thubuai chhuitu Anti Corruption Bureau (ACB) chuan kum 2020 chhung khan complaint pariat an dawng a, thubuai ziah luh (regular case register) erawh an nei lo.

ACB hian complaint an dawnin, Lokayukta-ah an thawn a, anni'n chhui zui tlak a nih leh nih lohah thutlukna an siam ṭhin. Chhui zui tlâka ngaihte chu ACB-in an chhui zui a, an chhuina report chu Lokayukta-ah thawn lehin, regular case nge, departmental inquiry-a kalpui turah thutlukna Lokayukta-in a lo siam ṭhin a ni. 

Nikumah khan ACB hian preliminary enquiry pariat an ziak lût a, a thu azirin a chhui chhung a inang lo; ṭhenkhat chu rei lo deuh a awm a, kum khat aia tam daih hun mamawhna a awm bawk. Preliminary enquiry zawh a nih hnuah kalpui a nih zel dan turah Vigilance-in thutlukna an siam ang.

Hetih lai hian, ACB-in criminal case an ziah luh an chhui zawh tawhah kum 2020 chhung khan Court-in thutlukna pathum a siam a; thubuai pahnihah eiruah puhte'n thiam an chang a, thubuai pakhatah erawh chuan eirua puh thiam loh chantir a ni.

Lokayukta-in ACB kaltlang loa complaint a dawn chuan an zir chian hnuah chhui zui ngaite chu ACB-ah an thawn ṭhin. Nikumah erawh chuan Lokayukta hian direct-a complaint an dawn ACB chhui zui tura tih an nei lo.