MYC Chairman-in an hmalakna a puang

Mizoram Youth Commission (MYC) chairman Dr Vanlalṭanpuia, MLA chuan nimin khan MYC conference room-ah thuthar thehdarhtute a kâwm a, kum 2020 chhunga MYC hmalaknate an hrilhfiah.

Dr Vanlalṭanpuia chuan, Covid-19 avangin an hmalakna turah harsatna an tawh nasat thu a sawi a, "Hmalakna tura hmachhawp kan neih tam zawk kan hlen chhuak thei lo a, ruahmanna siam tawhte chu her danglamin, a theih dan danin TV kaltlangtea hmalak a ni,'' a ti.

MYC kalphung chu zau zawka ṭhalai huap tura her danglam an tum thu sawiin Vanlalṭanpuia chuan, "Coaching leh a kaihhnawihah hian MYC hi kan inhmang ral lutuk a, hemi kî hi ti hniamin, ṭhalai tam zawk huap zo turin kalpui kan duh. Lehkhathiam sang chauh ni lo, ṭhalai unskill tan pawh kumin aṭang chuan hmalak kan tum," a ti.

MYC hotute tarlan danin, Aizawl, Lunglei leh Serchhipa Youth Centre sakna atan MYC-in cheng nuai 1,200 a ruahman a, Aizawla Office cum Coaching Centre sak nan cheng nuai 300 ruahman niin, Serkawna Incubation cum Coaching Centre sak tum a ni bawk. January 12, 2021 hian MYC Centre thar Kolasib-ah hawn a ni dawn a, Siahaah pawh hawn thuai tum a ni.

Sipaia ṭang duh tan May 2021 thla tàwp lamah Army Rally nei turin inbuatsaih ṭan a ni a, Assam Rifles leh Counter Insurgency and Jungle Warfare School, Vairengte-te nen thawhhona thuthlung ziak turin buaipui mek mek a ni bawk.

MYC leh ALS, New Delhi chuan thuthlung ziakin, Aizawl, Lunglei, Siaha leh Kolasib-ah seat 100 awmna IAS offline coaching class kalpui turin ruahman mek a ni a, hripui léngin a ziaawm hunah class ṭan a ni ang.

Mizoram Youth Commission (MYC) hotute sawi danin, Mizo ṭhalai  Mizoram páwna hnathawk, Covid-19 léng vanga hna thawh tur nei ta lote inhriattirna tur MYC-in a siamah mi 2,632 an inziak lut tawh.

Mizoram páwna hnathawk, Covid 19 léng vanga hna chána Mizorama hawte tan loan remchang ang ang ngaihtuahsak turin Mizorama bank hrang hrang hotute ngen an ni a; North Eastern Council (NEC)-in migrant worker-te tana sum a pek chhuah tur cheng nuai 300 aṭanga department/agency hrang hrangin project an thehluhah MYC chu Nodal Implementing Agency atan Mizoram sorkarin a ruat a ni.

NEC hian sum eng emaw zat an pe chhuak a, department hrang hranga hma latu turte hnenah 60% pek chhuah a ni tawh. MYC-in migrant worker-te tana project a buatsaih thawh hnihna (phase-II) atan NEC chuan cheng nuai 270 aṭangin eng emaw zat a pe chhuak tawh bawk.