Kohhran phal chinah politics khelh tur - ZPM Vice President

ZPM vice president K Sapdanga chuan, kohhranin a phal loh chu ti lo tur leh kohhranin a phal china politics khelh tur tih chu ZPM inzirtirna laimû a nih thu a sawi.

ZPM Ṭhalai Aizawl East-I Block hruaitu thlanna, January 5, Thawhlehnia Ṭhuampuia a hmanpuinaah thu sawiin K Sapdanga chuan, "Kohhranin a phal loh chin chu ti lo tur leh kohhranin a phal china politics khelh tur tih chu ZPM inzirtirna laimû a ni," a ti a; chu chu party dangin, 'ZPM unit chu kohhran' tiin an lâk kawihsak tih sawiin, "Kohhran hi unit-a hman chi a ni lo a, mahse, kohhran duh dan pêlin ZPM hi a kal dawn lo," a ti.

K Sapdanga chuan, "Ram rorelnaah mipui kan dah pawimawh hmasak chuan hmasawnna rualkhai tak kan hmu dawn a ni," a ti a; ZPM chu ṭhalaite ta a nih thu leh ṭhalai hruaitu ṭha tak takte zarah Zoram thar siam theih ngei a beisei thu a sawi.

ZPM Vice President chuan, Japan ram din chhuahna kawnga thawh hlâwk tak Hiroshi Mikitani-a'n a mimal hlâwkna aia ram mipui a dah pawimawh hmasa tih sawiin, "ZPM pawhin ram rorelnaah mipui kan dah pawimawh hmasa dawn a, mipui kan dah pawimawh hmasak chuan rualkhai takin hma kan sawn dawn a ni," a ti a; chutianga hma la tur chuan ZPM-ah lut zel turin mipui a sáwm a ni.