Kiosk-a swab test tur lâkte Inkhung tura hriattir an ni

Health & Family Welfare department chuan Covid-19 hripui léng leh inkài chhàwn theihna lakah mipui an him tlan theihna turin hriattirna a tichhuak a; kiosk kaltlanga swab test tur lâkte chu mahni ina inkhung turin an hriattir.

HFW department chuan, "Mi tu pawh, mahni ṭul leh mamawhna avanga Covid-19 test atana swab sample, testing kiosk-a late reng reng chuan an test result a chhuah hma chu mahni inah inkhung hrangin, mahni in an chhuahsan tur a ni lo," a ti. He hriattirna hi chhuah a nih aṭanga thu dang a awm hma chu zawm tur a nih thu an tarlang bawk.

Health department hian Covid-19 testing kiosk-a swab sample test man a bithliah a; chu'ngte chu - RT-PCR hmanga endikah Rs. 2,000, TrueNAT-PCR hmanga endikah Rs. 1,500 leh Rapid Antigen Test hmanga endikah Rs. 500 a ni.