Tlungvel Skill Development Centre hawng

Assembly deputy speaker Lalrinawma chuan, nimin khan a bial chhunga Tlungvel Branch MHIP-in puanṭhui zirna tur an buatsaih Skill Development Centre a hawng a; hlawhtling turin hun laklawha bànsan mai loa theihtawp chhuaha beih a ngaih thu a sawi.

Lalrinawma chuan, eng hnaah pawh inpek a ṭul a, rinawm leh dik taka thawh a ngai tih sawiin, "Tumna tak tak neia kan beih a ngai a, hlawhtling tur chuan hun laklawha bànsan mai loa theihtawp chhuaha kan beih a ngai a ni," a ti.

Deputy Speaker chuan, a bial chhung khaw hrang hranga MHIP branch-te hnenah puan ṭhuina atana hmanrua - sakawrbakcheh leh puan tehna (measuring tape) sem ila, chumi hnuah puanṭhui zirna hawng thei branch an awm chuan puanṭhui khawl kan pe ang, tia a lo sawi tawh thu a sawi a; "Tlungvel Branch MHIP-in puanṭhui zirna an hawng thei hi a lawmawm hle a ni," tiin, an inpekna leh hmalaknate fakawm a tih thu a sawi.

Khawvel ṭhang zelah kut themthiamte an hlu zel tih sawiin Lalrinawma chuan, sorkarin kut themthiamte hlutna leh pawimawhna a hre chiang zel a, scheme chi hrang hrangin hma a la mek tih a sawi a, "Puanṭhui hi eizawnna tlâk a ni a, puanṭhuia ei zawng, chhungkaw châwm tam tak an awm tawh a ni," a ti.

Tlungvel MHIP Skill Development Centre-ah hian 1st batch-ah zirlai pakua leh zirtirtu pakhat an awm a; Deputy Speaker hian a MLA fund aṭanga lei puanṭhuina kháwl panga a pe a ni.