Siaha Sub Hqrs YMA hawn a ni; Hawn hun tura ruatah hawng thei lo

Central YMA president Lalhmachhuana chuan nimin khan Siahaah YMA sub-headquarters a hawng a; thil hriatthiam loh eng emaw a awm avangin hawn hun ah hawn theih a ni lo thung.

CYMA chuan Lunglei Sub-Hqrs YMA hnuaia awm ṭhin Chhimtuipui Group YMA chu Siaha Sub-Hqrs YMA-ah a dah thar a; chumi hawng tur chuan CYMA hruaitute chu president Lalhmachhuana hoin eng emaw zat Siahaah an kal a, Lunglei Sub-Hqrs YMA hruaitu eng emaw zat an kal bawk.

Ruahman dan chuan, nimin chhun dar 1 khan Siaha Sub-Hqrs YMA chu Siaha New Colony YMA Hall-ah hawn tur a ni a; mahse, Mara Thyutlia Py (MTP) Gen.Hqrs lamin hriat duh an neih avangin a hunah hawn theih a ni lo. Mipui eng emaw zat an pung khawm a, buaina chhuak thei veng turin police ṭhahnem tak an tlân khawm ve nghal.

CYMA leh MTP hruaitute an inbia a, chumi hnu tlai lamah Siaha Sub-Hqrs YMA chu hawn a ni a, harsatna a thleng zui lo.

CYMA hruaitute chuan, MTP lamin hawn an remtih chiah lo avangin a hunah an hawn theih loh thu an sawi a, "Inbiakna neih a ni a, kan hawng thei turah chuan kan ngai. Min lo ngaichâng rawh u an ti a, kan ngaichâng mek," tiin an hawn hmain Vanglaini palai zawhna an chhang.

MTP hruaitute chuan Vanglaini zawhna chhangin, an hawn tum dan leh hmalak tum dan hriat hmasak an duh tih an sawi a, "Hawn kan phal lo pawh a ni chiah lo. CYMA hruaitute nen inkawm phawt kan duh a ni. Chaw an ei kham hnuah inpawh takin kan inkâwm," an ti.

MTP hruaitute chuan, CYMA leh MTP chu hnam inlungrualna tichhe zawnga hma la ngai lo an nih thu sawiin, "Hmalak pawh tum ngai lo kan ni," an ti a, harsatna awm loin Siaha Sub-Hqrs YMA chu hawn a nih thu an sawi.