MJA-in an member-te lawmpuina hlan

MJA General Headquarters chuan nimin khan an member pahnih - tun hnaia Indian Information Service (IIS)-a tling Andrew Lalchhandama leh Mizoram University Mass Communication department aṭanga doctor of philosophy hmu Lalnunkimi Colney te lawmpuina an hlan.

Lawmpuina hlanna inkhawm hi Aizawl Press Club-ah buatsaih niin, MJA vice president C Lalhmachhuana'n a kaihruai a, MJA president C Lalrambuatsaiha'n lawmpuina a hlan. DDK, Aizawl editorial assistant Andrew Lalchhandama leh The Mizoram Post reporter Lalnunkimi Colney hnenah hian lawmpuina atan thuchei leh Rs 10,000 ve ve hlan a ni.

MJA President chuan, MJA member aṭanga IIS-a tling thei leh PhD hmu thei an awm chu MJA-in an lawmpui tak zet thu a sawi a, "Kan chhuang dun hle a, MJA tan bung thar kaina a ni. Eng hna pawh thawk ila, hlawhtling tur chuan taima taka theihtawp chhuah a ngai a, anni pawh hian kan hriatpui lohin nasa takin an bei a ni," a ti a; an member pahnihte hlawhtlinna chuan MJA hmel a tihmawi thu sawiin, an kal leh zelna turah hlawhtlinna sang zawk nei zel turin duhsakna a hlan.

Lawmpuina inkhawmah hian Lalnunkimi Colney leh Andrew Lalchhandama te pawhin thu an sawi a; an hlawhtlinna chan chu MJA leh a member-te zara nei thei an nih thu an sawi a ni.