Dr Zoramdinthara'n National Award to Teacher for Higher Education a dawng

Mizoram University-a associate professor Dr. Zoramdinthara, Mizo department HoD chuan nimin Teachers' Day-ah khan zirtirtu ṭha chawimawina, National Award to Teacher for Higher Education 2025 a dawng.

National Award hlanna inkhawm hi Vigyan Bhawan, Delhi-ah buatsaih a ni a, President Droupadi Murmu chuan Dr Zoramdinthara hnenah chawimawina a hlan a ni. Kuminah hian ram pum huap zirtirtu ṭha chawimawina hi higher education-ah mi 21 leh school education-ah mi 45-in an dawng a; Skill & Entrepreneurship Ministry aṭangin mi 15-in chawimawina an dawng bawk.

Dr Zoramdinthara hi Mizo zinga Higher Education-a National Award dawng hmasa ber a ni a, Award hian silver medal, thuchei leh Rs 50,000 a keng a ni.

Dr Zoramdinthara hian kum 2015 khan State NSS Award for Programme Officer chawimawina a dawng tawh a; kum 2016 khan President Pranab Mukherjee hnen aṭangin Indira Gandhi NSS Award for Programme Officer a dawng tawh bawk.