Ration card siamṭhat theih tawh; Hming belh theih a la ni lo

Food, Civil Supplies & Consumer Affairs department chuan thuchhuah siamin, March 2025 aṭanga ration card siamṭhat leh tihdanglam theih loh chu eng emaw zat tihdanglam theih a nih tawh thu an tarlang a; ration card thar siam leh chhungkuaa hming dah belh erawh tih theih a la nih loh thu a tarlang.

FCSCA department chuan, Ministry of Consumer Affairs, Food and Public Distribution chuan Public Distribution System (PDS) hnuaia mipuite hamṭhatna turin SMART-PDS (Scheme for Modernisation and Reform Through Public Distribution System) a siam thu an tarlang a, "SMART-PDS hian a tum chu mipuite'n awlsam zawka ration card-a hming thlak, hming paih, insawn, card thlak, card print leh a dangte a huam," an ti.

SMART-PDS hman a nih dawn avangin March 2025 aṭangin ration card khawih danglam theih a nih loh thu tarlangin FCSCA chuan, "He application thar hi hman vat a nih theih nan Mizoram FCSCA department chuan theihtawpin hma a la a, tun dinhmunah ration card kaihhnawih thil eng emaw zat tihdanglam theih a ni tawh," an ti a; tihdanglam tur nei tan mahni bialtu DCSO-ah ngaihven theih a nih thu a tarlang.

TIHDANGLAM THEIH TAWHTE
1. Ration card holder (hming neitu) thlak
2. Ration card sawn
3. Ration card tihtawp
4. Ration card-a member paih
5. Ration card print chhuah