KHAWTHLIR

KṬP-in thisen pe

KṬP, Maubawk Pastor Bial chuan nimin khan thisen pek an huaihawt a, Synod Hospital, Aizawl tan thisen unit 54 an pe a, petute mipa 42 leh hmeichhia 12 an ni.

Bawlhhlawh paih motor vailiam

​Aizawl mayor Lalrinenga Sailo chuan September 4, Ningani khan a bial, AMC Ward-I chhunga local council pali - Durtlang, Durtlang Leitan, Durtlang North leh Leitan Ramthar LC-te hman turin bawlhhlawh ṭawih thei phur lirthei (wet waste vehicle) pali a vailiam. Mayor chuan, "Aizawl a thianghlim zawk nan AMC-in nasa takin hma a la zel a, tunah hian LC 19 hnenah ṭawih thei paihna tur motor a bika siam kan pe chhuak mek,” a ti.

Humhalh tur pawm

Khawzawl bawrhsap K Vanlalṭhiana kaihhruaiin September 4, Ningani khan a pisaah sorkar hotute leh khawtlang hruaitute'n vantlang ramngaw ṭha - Identification of Non-Notified Forest chungchang an sawiho a; vantlang ramngaw humhalh tura rawtna lut panga zinga pathum an pawm. Bawrhsap chuan, ṭhangtharte tan an thurel chuan rah ṭha a chhuah ngei a beisei thu a sawi.

Sorkar hnathawk thawh tawh zat

Mizoram Universal Healthcare Scheme (MUHCS) atana sorkar hnathawkin an hlawh aṭanga pawisa an thawh (contribution) aṭangin Mizoram Health Care Society (MSHCS) chuan Finance department aṭangin cheng vbc. 3.78 a dawng tawh. MUHCS hnuaiah hian July 2025 thleng khan sorkar hnathawk mi 36,324 an awm a ni.

Birth & Death unit

Economics & Statistics department-a Kolasib District Research Office hmalaknain September 4, Ningani khan Kolasib district-ah nau piang leh mitthi chhinchhiahtu Registrar of Birth & Death Unit thar pasarih hawn a ni. Registrar of Births & Deaths ruat tharte nen Kolasib District Research Office hnuaiah unit 52 a awm.