Lo zawh hi khualzin hîp nan ṭangkai taka hman theih a ni - Tourism Minister

Tourism department hnuaia Association of Tour Operators Mizoram (ATOM) leh Agriculture department buatsaihin nimin khan Hmunṭha zau lo zawhpui buatsaih a ni a, Agriculture minister PC Vanlalruata leh Tourism minister Lalnghinglova Hmar ten an hmanpui. Tourism Minister chuan, lo zawh chu khualzin hîp nan ṭangkai taka hman theih a nih thu a sawi.

Minister PC Vanlalruata, bialtu MLA ni bawk chuan, loneitute'n hlim taka lo zawhna hun an hmang thei chu a lawmpui thu a sawi a, "Ka bial chhung Hmunṭha khua hi khaw taima tak an ni a, Tourism department-te'n hma thar lakna tlak an ni tih hriaa hetiang ruahmanna an siam hi a lawmawm tak zet a ni," a ti a; Hmunṭha khuaah Tourism department-in homestay sa tura hma an la chu a lawm thu a sawi bawk.

Lalnghinglova Hmar chuan, lo zawh chu khualzin hîp nan ṭangkai taka hman theih nia a hriat thu a sawi a, "Keini'n ngaia kan neih hi state pawn lam mi, khualzinte tan thil hmuhnawm tak a tling ṭhin. Ṭâwi tlang hi tourism hmun atana puan a ni tawh a, khualzinte'n tlawh an châk theih nan chei a ni dawn a, India ram hmelhriat khawpa chei tumin ruahmanna kan nei mek," a ti.

Hmunṭha lo zawhpui hi agro tourism châwi kânna atana buatsaih a ni a; Tourism director R Lalrodingi, Agriculture director R Lalnunzira leh Hmunṭha VC president P Lalrinchhana te pawhin thu an sawi. Agriculture secretary Ramdinliani, SYS joint secretary H Dolianbuaia bakah sorkar department hotute an tel a, tlaiah lo zawhna ruai an kîl a ni.