Mizoramah Teachers' Day hman a ni

Nimin September 5 kha Teachers' Day (Zirtirtute Ni) a ni a, Mizoram hmun eng emaw zatah hman a ni.

Saitual District Committee on Celebration of Teachers Day bultumin nimin khan Saituala Dorawta Hall-ah Zirtirtute Ní hman a ni a; district bawrhsap Dr Lalngura Tlau-in hmanpuiin, kal khawmte'n pawisa an thawhkhawm Rs 21,340 chu Saituala hmun paliah an hlan.

Saitual Bawrhsap chuan, zirtirtute chu ramin a neih ro hlu ber enkawltu an nih thu sawiin, "Ram hmasawn ni thei turin kan ro hlute hi uluk taka enkawl a ngai. Naupang rilru leh ngaihtuahna kaihruai thei chu zirtirtu in ni a, zirna, finna leh hriatna nei hmasa si loa sum ringawt ngaihtuah hma lutuk chuan hmasawnna ni loin, chhiatna a thlen zawk ṭhin," a ti a; rilru inbûk tâwk taka naupang an seilen theih nan zirtirtute an pawimawh thu a sawi.

Teachers' Day lawmnaah hian zirtirtu pension tawhte leh zirtirtu kal zawng zawngte hnenah chawimawina parṭhi awhtir a ni a; kal khawmte'n an remchan anga an thawhkhawm Rs 21,340 aṭangin Saitual District Hospital Poor Fund-ah Rs 6,340 an hlan a, Hlimna In (Girl's Home), Serenity Boy's Home leh Sangtea Memorial Camping Centre-ah Rs 5,000 ṭheuh an hlan bawk.

Lunglei District Committee on Teachers' Day pawhin Saikuti Hall-ah Zirtirtute Ní lawmna an buatsaih a, Lunglei West bialtu MLA T Lalhlimpuia'n a hmanpui. T Lalhlimpuia chuan, zirtirtute chu ruihhlo laka inthiar fihlim a, an zirtirna leh an nun dan hmanga zirlaite tana zir tur pe tur leh, ṭhahnemngaihna leh inpekna thar nen Mizoram zirna tihmasawn tura theihtawp chhuah zel turin a chah. Lunglei DC Navneet Mann pawhin thu a sawi.

Teachers' Day hi nimina sikul mala hmang eng emaw zat an awm bawk.