Ruihhlo dona leh ILP drive hawng

Assembly deputy speaker Lalfamkima, Kolasib bialtu MLA chuan September 4, Ningani khan Kolasib DC conference hall-ah Kolasib district-a ruihhlo hman leh tawlhrûk do beihpui thlakna leh inner line permit (ILP) khauh zawka kalpuina tur, 'Operation Against Trafficking and use of Drugs & Narcotics & Special Drive on ILP' a hawng.

Lalfamkima chuan, ruihhlo chu Mizoram rûn mektu leh ṭhalaite suattu a nih thu a sawi a, "Khawtlang tiralmuang lotu hi tih tak zeta kan do a ngai. He operation pawimawh tak kan hawn tâk hi a tihhlawhtlin nan sorkar ringawt a tâwk dawn lo a, mi tu pawh tel turin ka sawm a ni," a ti.

Deputy speaker hian, dan loa damdawi ruihhlo tawlhru leh zuar hriate chu thuneitute hnena hriattir zel turin a chah a, thuneitute hnena hriattir chu inhèkna ni loin, ram siamṭhatna tur a nih zawk thu a sawi.