CAG Report MJA-in a hmunah an enfiah; Siam zawh loh anga tarlan siam zo tawh

Assembly session hnuhnung bera Chief Minister-in a pharh CAG report-a tarlan, PHE department hnuaia Buhchangphaia tui lakna siam chu MJA, Kolasib District member-te'n September 5, 2025 khan an tlawh a; CAG report-in hna thawh a awm loh thu tarlang mah se, tunah chuan hna thawh zawh a nih tawh thu an tarlang.

CAG Report-ah hian March 31, 2023-a dinhmun tarlan a ni a; Buhchangphai Solar Pumping Water Supply Scheme hnuaia cheng nuai 14.25 sênna 'Construction of Battle Wall Sedimentation Tank of Water Plant' chu May 16, 2022-ah thawh ṭan niin, July 15, 2022-ah zawh tur a ni.

Nuai 6.77 senna tur 'Construction of Zo Rawra Filter of Water Plant' chu June 17, 2022-a siam ṭan tur niin, July 15, 2022-ah zawh tur a ni a; cheng nuai 7.85 senna 'Construction of Clear Water Sump of 1,00,000 Litres Capacity' chu September 12, 2022-ah thawh ṭan a, November 9, 2022-ah zawh tur a ni bawk.

Project-te hi CAG leh PHE department official-te'n January 21, 2023-ah a hmunah an tlawh a, enfiah a nih lai hian hna zawh a la ni lo vek tih CAG report-ah a lang.

Kolasib MJA-te zawhna chhangin Buhchangphai Village WATSAN Committee chairman Sangbera, VC resident chuan, tui lakna siamna hmun chu dîl hmun a nih avbangin hna ṭan nghal turin harsatna a awm thu a sawi a, "Sangha dil hlui a ni a, dûm a tam a, a hmun nghah chàr a ngaih avangin a tirah hna thawh ṭan theih a ni lo," a ti a; hna an ṭan tlai a, zawh hun turah zo lo mah se, August 17, 2023-ah hman ṭan a nih thu a sawi.

PHE, Kolasib WATSAN Division executive engineer Lalrosangi sawi danin, Buhchangphai Solar Pumping Supply Scheme hmang hian ni khatah tui litre 1,40,000 pump chhuah ṭhin a ni a, ni khatah mi pakhatin tui litre 55 vel dawng ziah tura chhût niin, project ang chuan kum 30 chhung Buhchangphai châwm thei tura ngaih a ni.

Lalrosangi chuan, Buhchangphai khuaa chhungkaw chhungkaw 223-in tui connection an nei tawh a, PHE record-ah chuan tui connection nei lo an awm tawh lo tih a sawi a; pêm thar leh indang tharte an awm theih avangin tui connection nei lo palh erawh an awm theih thu a sawi bawk.