Vaivakawn traffic tâwt tihziaawm nan metre 75-a thui lei dawh tumin hma la

Vaivakawn pengṭhuama lirthei tâwt tihziaawm nan Public Works department (PWD) chuan Joint YMA Field sir zawhin Vaivakawn Bazar leh Vaivakawn bus stand chhaka Dawrpui Vengthar panna kawng inkarah metre 75-a thui lei (bridge) dawh tumin hma an la.

September 6, Inrinni khan PWD minister Vanlalhlana hoin Vaivakawn Cultural Centre conference hall-ah PWD hotute leh Aizawl West Joint YMA hruaitute'n Vaivakawna traffic jam nasa lutuk tihziaawmna tura PWD ruahmannate an sawiho a; Aizawl West Joint YMA hruaitute'n a thuphungin PWD ruahmanna an thlâwp thu an sawi.

Vanlalhlana chuan, lirthei pung zel avangin Vaivakawn pengṭhuam (traffic junction)-ah traffic jam avangin lirthei khalhtute'n hun tam tak an khawhral phah ṭhin tih a sawi a, "Traffic jam vanga he kawng pawimawh tak zawhtute harsatna sutkian a nih theih nan khawtlang hruaitute ráwn chungin ruahmanna siam a ṭul a, khawtlang leh ram tihhmasawnna tura Aizawl West Joint YMA hruaitute inhawnna a lawmawm," a ti.

PWD chief engineer Robin Lalrinawma leh superintending architect Lalengzuali ten lei dawn tura an ruahmannate an sawifiah. An tarlan danin, Vaivakawn pêngṭhuam hêlna tur ruahmanna kalpui theih a nih chuan, Joint YMA Field sir, Vaivakawn Bazar leh Vaivakawn bus stand chhaka Dawrpui Vengthar panna kawng inkarah metre 75 (ft 246)-a thui lei dawh tur a ni a; lei zau lai ber metre 15.5 leh a zîm lai ber metre 7.5 tur niin, ban 14 a awm ang.

Ṭhutkhawmah hian lei dawh tur chu Joint YMA Field huam chhungah ban (pillar) awm lo tur leh lei chu field hmangtute tan hnawk pha lo tura siam a ṭul thu sawi a ni a; Aizawl West Joint YMA hruaitute chuan a thuphungin PWD ruahmanna chu an thlâwp thu an sawi bawk.