YMA branch inelna - Veng fai endik ṭan

UDPA department, Aizawl Municipal Corporation, Aizawl Smart City Ltd leh Central YMA thawhhonaa Aizawla YMA branch (veng) fai inelna kal mekah endiktute'n September 6, Inrinni khan veng hrang hrang an endik ṭan.

Aizawla YMA branch fai inelna endiktu (panel of judges)-te hi Save the Riparian hotu Romalsawma, Environmental Science-a research scholar Gospel Lallawmzuali leh MJA general secretary K Zothanpara te an ni a; September 6 khan Aizawl hmar lam aṭangin endik thawh khatna an ṭan a, an endik turte chu hrilh lâwk vak loin an endik a ni.

Fai inelnaah hian AMC huam chhunga YMA branch zawng zawng bakah, AMC pawn lama khua/veng ṭhenkhata YMA branch-te telin, an vaiin branch 109 an ni a; endik thawh khatna hi kumin September aṭanga November thlengin neih a ni dawn a, nakkum 2026 tir lamah a thawh hnihna atan an endik leh ang.

Aizawla YMA branch fai inelna hi March 31, 2025 khan UDPA minister K Sapdanga'n Sikulpuikawnah a lo hawng tawh a, hemi ni hian Aizawla YMA branch hrang hrangin faina hnatlangpui an nei nghal. Kumin June thla khan Central YMA Hall-ah inelna khuhhawnna leh thil pawimawh inhrilhfiahna hun hman a ni bawk.

Veng faina lama YMA branch inelnaah hian pakhatnain Rs 3,00,000, pahnihnain Rs 2,00,000 leh pathumnain Rs 1,00,000 an dawng dawn a; endik thawh khatna leh thawh hnihna inkara faina lama hmasawn bera thlante hnenah lawmman hlan a ni bawk ang.