Aizawl Venglai rah remti rih lo

Aizawl Venglai All NGO Coordination Committee chuan, August 30, 2025-a Assam Rifles leh Excise & Narcotics department ṭang dunin Upper Republic-a heroin gram 74 kaihhnawiha an man Lalramthanga s/o C Hrangsaithanga, Aizawl Venglai chu an veng rah an remti tawh rih lo.

Aizawl Venglai NGO hian thuchhuah siamin, heroin kaihhnawiha man zingah an veng mi a tel chu pawi an tih thu an tarlang a, "Mizoram mipui hnenah ngaihdam kan dil tak meuh a ni. C Lalramthanga hian a thubuai chinfel a nih hma chu veng chhung a rawn rah kan remti tawh rih lo. Sorkara thuneitute a chungah dan anga na taka action la turin kan ngen. Hemi kawngah hian sorkar thutlukna ang ang chu veng mipuite'n kan thlawp tlat ang," an ti.

Sorkarin ruihhlo tihrêm tuma theihtawp a chhuah mek laia ram leh hnam tihmualpho theihna thil, ruihhloah an veng mi a inhnamhnawih chu pawi an tih thu sawiin Aizawl Venglai NGO chuan, "Khawtlangin ruihhlo dona kawnga theihtawp chhuaha hma kan lak reng laia ruihhlo tawlhrukna lian tham takah kan veng mi a lo inhnamhnawih hi pawi kan ti," an ti a, an dem tak zet thu an tarlang.