KHAWTHLIR

Thisen pe

September 6, Inrinni khan KṬP, Mission Veng Branch chuan an hmunah thisen pek an huaihawt a, ZMCH blood bank tan thisen unit 84 an pe a, petute mipa 71 leh hmeichhia 13 an ni. Inrinni vek khan Lunglei Civil Hospital tan ṬKP, South Vanlaiphai Bial-in unit 69 an pe a, petute mipa 63 leh hmeichhia paruk an ni a; Darzo Drivers Association-in unit kua an pe bawk.

Luiah tla hlum

August 4, 2025 khan Laldinsanga (17) s/o Lalngena, Chawngtelui, Lawngtlai district chu sangha man tura an kalnaah luiah a tla a, a ṭhiante'n chhan tum mah se, an chhan thei lo. Laldinsanga ruang hi August 6, Inrinni khan a tlakna aṭanga lui mawng lam km 6 vela hláah hmuh a ni a, nimin khan vui a ni.

Muanna Vengah plastic ûm lei

Aizawl mayor Lalrinenga Sailo chuan September 6, Inrinni khan a bial chhunga Muanna Veng Local Council buatsaih plastic ûm (bottle) chhia leina hun a hmanpui a, faina lama hmalakna atan Rs 10,000 a pe. Lalrinenga Sailo chuan, "Mihring leh ran êk rimchhia awmna veng chu eng ang pawhin phiat fai mah se, veng faia ngaih theih a ni lo," a ti a; plastic ûm hralh tura chhar khawmtu naupang kal khawmte chu bawlhhlawhte a bâwmah chauh paih ṭhin turin a chah.

Vbc 42.02 pe tawh

Mizoram sorkar chuan September 6, 2024, Inrinni thleng khan Mizoram Universal Healthcare Scheme (MUHCS) atan cheng vbc 42.02 a pe chhuak tawh. Cheng vbc 42.02 hi damlo mi 32,263 enkawlna senso a ni. MUHCS-ah hian inziah luh hun a tawp tawh a; sorkar hnathawk mi 36,324, pensioner 10,163 leh mipui chhungkaw 20,147 an inziak lut a ni.

CADS ruihhlo man zat

Central YMA hnuaia Central Anti Drug Squad chuan kumin August 30 leh September 5 inkar khan heroin (no. 4) hawng 8 leh Tictac bûr 33 an man a; ganja kg. 6.178 leh pregabalin mûm 321 an man bawk. Ruihhlo man kaihhnawihah hian mi 41 an man a, chu'ng zinga mi pathum chu Excise & Narcotics department hnenah an hlan.